أكدت تدوينة كتبها د.محمد محسوب نائب رئيس حزب الوسط وعضو تحالف دعم الشرعية على " الفيس بوك " حتمية نزول كل مواطن مصري يوم 25يناير، ذاكرًا  حيثيات الدعوة إلى النزول.

وقال في التدوينة:

ما تنزلش لو..

ما تنزلش.. لو زعلك غياب مبارك لأنه عااااد.. بوشوش جديدة وبألف سجن وسلخناته ورجال فساده بس المجازر شوية أكتر..

ما تنزلش.. لو كنت قرفان من ثورة يناير ومن ثوارها وبتقول أعيش ولو مكسور أو مسروق بس يكون فيه استقرار..وما يمنعش برضه زوار الفجر..

ما تنزلش لو كنت بتكره اليساري وشايفه ضد دينك..

ما تنزلش لو كنت بتلعن الليبرالي وشايفه بيهدد هويتك..

ماتنزلش لو كنت شايف الإسلاميين يستهلوا القتل والحرق وجرفهم بجرافة العسكر..

ما تنزلش لو كنت شايف الإخوان مش مواطنين وعايز تسحب عنهم الجنسية..

ما تنزلش لو شايف إن ممكن الثورة تنجح بانقسامها في ميدانين كل ميدان بيلعن التاني..

ماتنزلش لو كنت شايف إن اللي ينزل لازم يكون تبعك ويمشي وراك أو ما ينزلش..

ما تتزلش لو كنت بتتشرط على أخوك وبتفرط مع اللي حبسوك وعذبوك..

ما تنزلش لو كنت شايف إن دمك أغلى من دم اللي مات أو كنت شايف إن فيه شهيد أفضل من شهيد..

ما تنزلش لو كنت ناوي في الطريق ترفع شعار ضد رفيق الميدان لأنه يوم أخطأ في حقك.. لأنك بكده بتخطأ ف حق الوطن..

ما تنزلش لو كنت شايف إن اللي بيحصل خلاف ع السلطة بين فريق بيموت وفريق بيحرق اللي بيموت..

ما تنزلش لو كنت مش شايف إن القضية وحدة ولسه وحدة.. وإن الوطن واحد وها يبقى واحد وإن الدم واحد مهما اختلف صاحبه في رأيه عنك..

ما تنزلش لو كنت فاكر إنك النهاردة بتدعو لوحدة الصف وبكرة ممكن تنقلب عليه.. لأن الثورة ها تتسرق تاني لو انقسمنا تاني..

ما تنزلش لو كنت فاكر إن الثورة بس ها تنتصر لو إنت نزلت..

لأنها ببساطة ها تنتصر بإذن الله .. سواء ما نزلتش أو نزلت..